Anthropic Imesema Imevuruga Mashambulizi ya kidukuzi ya AI Kutoka Russia na China dhidi ya Claude.

Anthropic imesema imevuruga kampeni kadhaa za kidukuzi zilizolenga kutumia Claude katika kipindi cha miezi minane iliyopita. Kampuni hiyo inasema baadhi ya kampeni hizo zilihusishwa na ujasusi kutoka Russia, huku nyingine zikihusisha maabara za AI nchini China zilizojaribu kutumia Claude kupata uwezo na data ya kuimarisha modeli zao.

AI Sasa Inafanya Zaidi ya Kumsaidia Hacker

Kwa mujibu wa Anthropic, matumizi ya AI katika mashambulizi ya mtandao yamebadilika. Badala ya kumsaidia tu hacker kuandika code au kutafuta taarifa, mifumo ya AI ilitumika kufanya sehemu kubwa ya kazi yenyewe, huku binadamu akibaki zaidi kutoa maelekezo na kusimamia mchakato.

Anthropic ilisema imevuruga kampeni zilizohusisha maabara saba za AI nchini China, zikiwemo Alibaba, Moonshot, DeepSeek na Xiaomi. Katika tukio lililohusishwa na Alibaba, Anthropic ilidai kulikuwa na zaidi ya mabadilishano milioni 151 na Claude kati ya Mei na Julai 2026, katika jaribio la kutumia majibu ya Claude kusaidia kuboresha modeli ya Qwen kupitia mchakato unaojulikana kama distillation.

Russia Nayo Ilitumia AI Katika Ujasusi

Anthropic pia ilisema kundi lenye mbinu zinazofanana na Midnight Blizzard ya Russia lilitumia AI katika kampeni zilizolenga watu na taasisi zinazohusiana na serikali, jeshi na diplomasia ya Ukraine.

Kampeni hiyo ilihusisha mbinu kama phishing na kujaribu kuingia kwenye mifumo ya walengwa. Anthropic ilidai AI ilitumika katika hatua mbalimbali za operesheni, ikiwemo kusaidia kubadilisha malware pale ilipogunduliwa na mifumo ya ulinzi.

Hapo ndipo ukubwa wa mabadiliko unapoonekana. AI inaweza sasa kusaidia kufanya kazi nyingi zinazohitajika katika operesheni ya kidukuzi kwa kasi kubwa, badala ya kuwa chombo cha kumuongezea hacker ufanisi tu.

Claude Ilitumika Pia Katika Masuala ya Silaha

Anthropic imesema matumizi mabaya ya Claude hayakuishia kwenye mashambulizi ya mtandao. Kampuni hiyo pia iliripoti matumizi yanayohusiana na programu za silaha na mifumo ya kijeshi, pamoja na ukusanyaji wa taarifa na shughuli nyingine zinazohusiana na programu hizo.

Hii inaongeza uzito kwenye mjadala unaoendelea kuhusu AI yenye uwezo wa kufanya kazi nyingi yenyewe. Kadiri mifumo hiyo inavyokuwa na uwezo mkubwa, ndivyo inavyokuwa muhimu zaidi kujua inaweza kufanya nini, nani anaweza kuitumia na mipaka gani inapaswa kuwekwa.

Tatizo Kubwa Sasa Si AI Pekee

Kinachofanya taarifa hii kuwa muhimu si kwamba Claude imevamiwa tu. Ni kwamba AI yenyewe inaanza kuwa sehemu ya mchakato wa mashambulizi.

Kampuni za AI zinakabiliwa na changamoto mbili kwa wakati mmoja: kujenga modeli zenye uwezo mkubwa zaidi na kuhakikisha uwezo huo hautumiki kufanya madhara kwa kiwango kikubwa. Na kama Anthropic inavyosema, mstari kati ya AI inayosaidia mtu kufanya kazi na AI inayofanya sehemu kubwa ya kazi yenyewe unaanza kuwa mwembamba.

Soma Pia:

• Baada ya Matukio ya Udukuzi ya OpenAI, Trump Asema Marekani Inafikiria Kuweka Udhibiti wa AI 

• Anthropic Yaishutumu Alibaba Kwa Kuiga Claude AI Kinyemela 

• Sony na Warner Music Zaishtaki Anthropic Kwa Kutumia Nyimbo Zao Kufundisha AI ya Claude 

• Makampuni Makubwa Marekani Yakumbwa na Mashambulizi ya AI: Nike, OpenAI na Wengine Wahanga 

• Makampuni Makubwa ya Teknolojia Yatangaza Hali ya Hatari Baada ya Kushindwa Kuzibithi Dukuzi za AI 

Vyanzo:

• Reuters — Anthropic disrupts Russian, Chinese AI campaigns targeting its Claude models 

• U.S. News — Anthropic Disrupts Russian, Chinese AI Campaigns Targeting Its Claude Models 

• BBC — Anthropic blocks ‘malicious use’ of AI that could develop biological weapons 

• FoneArena — Anthropic September 2026 Threat Report: AI Misuse Across Cyber Operations, Surveillance and Weapons