Apple iko karibu kufungua ukurasa mpya wa historia ya iPhone. Kesho, Septemba 9, kampuni inatarajiwa kuonyesha iPhone yake ya kwanza ya mkunjo, bidhaa ambayo imekuwa ikisubiriwa kwa miaka wakati Samsung, Huawei na wengine wakiendelea kujenga soko hilo. Lakini safari hii macho hayataangalia simu pekee. Zitakuwa pia kwa John Ternus, CEO mpya wa Apple, ambaye hii ndiyo launch yake kubwa ya kwanza tangu achukue nafasi hiyo kutoka Tim Cook.
Ternus si mtu mpya ndani ya Apple. Amefanya kazi kwenye kampuni hiyo tangu 2001 na amekuwa akihusika kwa karibu na uhandisi wa vifaa vya bidhaa mbalimbali, ikiwemo iPhone, iPad na AirPods. Lakini kuwa CEO ni mchezo mwingine kabisa. Apple ilitangaza mapema mwaka huu kwamba Tim Cook angekuwa Executive Chairman na Ternus angechukua nafasi ya CEO kuanzia Septemba 1. Sasa, siku chache tu baada ya kuanza kazi rasmi, anasimama mbele ya dunia na bidhaa ambayo inaweza kuweka alama ya kwanza kwenye uongozi wake.
Kwa nini iPhone ya mkunjo ni muhimu?
Kwa miaka kadhaa, Apple imeangalia soko hili kutoka pembeni. Samsung imekuwa ikitoa Galaxy Z Fold na Z Flip, Huawei imeendelea na simu zake za mkunjo, huku kampuni nyingine zikijaribu kutatua matatizo kama uimara wa hinge na mstari unaoonekana katikati ya display.
Apple sasa inaingia wakati ambapo foldable bado ni sehemu ndogo ya soko la smartphone, lakini kampuni inaamini inaweza kuibadilisha kwa njia ambayo imezoeleka kwake: kuchukua teknolojia ambayo tayari ipo, kuisafisha na kuifanya ionekane tayari kwa matumizi ya kawaida. Financial Times inaripoti kwamba Apple imekuwa ikifanya kazi kwenye teknolojia hiyo kwa miaka kadhaa, huku durability na crease ya display zikiwa miongoni mwa changamoto kubwa zilizokuwa zikishughulikiwa.
Na hii ndiyo sehemu inayofanya uzinduzi huu uwe wa kuvutia zaidi. Apple haiingii kwenye foldable kwa bei ya kawaida. Ripoti za sasa zinaonyesha kwamba simu hiyo inaweza kuanzia zaidi ya dola 2,000, huku Reuters ikisema matarajio ya wachambuzi yanaifikisha zaidi ya dola 2,500. Hiyo inaiweka moja kwa moja kwenye eneo la bidhaa za premium sana.
Apple inauza nini hasa?
Kwa mtazamo wa kawaida, ni iPhone inayokunjwa. Lakini Apple haitauza tu uwezo wa kufungua simu na kupata screen kubwa. Itakuwa inauza uzoefu wa kutumia iPhone katika muundo mpya, pamoja na ecosystem ambayo tayari ina mamilioni ya watumiaji.
Hilo ndilo linaweza kuwa nguvu kubwa ya Apple. Mtu anayenunua iPhone ya mkunjo haanzi kutoka sifuri. Tayari anaweza kuwa na iCloud, AirDrop, Apple Watch, Mac na huduma nyingine za Apple. Kwa hiyo kampuni haihitaji kumshawishi mtumiaji kwa hardware pekee; inahitaji kumshawishi kwamba muundo huu mpya unastahili bei yake.
Tim Cook ameiacha Apple ikiwa kampuni kubwa sana, lakini pia amemwachia Ternus matarajio makubwa. Ternus sasa anatakiwa kuonyesha kwamba anaweza kuendeleza kasi ya Apple bila kujaribu kuwa Tim Cook mwingine.
Hapo ndipo iPhone ya mkunjo inakuwa zaidi ya bidhaa mpya. Ikifanikiwa, inaweza kuwa mwanzo mzuri sana wa enzi yake. Apple inaweza kuingia kwenye soko jipya, kuongeza thamani ya iPhone na kuwafanya watu waliokuwa wamesubiri sababu mpya ya kubadilisha simu kuanza kufikiria tena. Lakini ikishindwa, bei yake kubwa inaweza kufanya kila tatizo lionekane zaidi. Kwa zaidi ya dola 2,000, mtumiaji hatarajii tu simu inayokunjika. Anatarajia Apple kuonyesha kwa nini ilistahili kusubiriwa.
Na kesho, John Ternus atapata nafasi yake ya kwanza ya kujibu hilo swali. Je, iPhone ya mkunjo inaweza kuwa bidhaa itakayowafanya watu waache simu zao za kawaida, au Apple imeingia kwenye mchezo huu ikiwa imechelewa?
Timu ya uandishi wa Kona ya Teknolojia ingefurahi kupata sapoti yako ili iendelee kukuletea habari na maujanja mbalimbali.
Wezesha bando kwa kutuma kiasi chochote kupitia Selcom, kwenye simu yako bofya *150*50*1# kwenye namba ya malipo weka 60751369 jina litakuja TEKNOKONA.
No Comment! Be the first one.