India Imeagiza Kuzuiwa kwa Chaneli 35 za YouTube za Pakistani na Tovuti

Wizara ya Habari na Utangazaji imeamuru kuzuiwa kwa chaneli 35 za YouTube na tovuti mbili ambazo zilikuwa zikiendesha propaganda dhidi ya India na kueneza habari za uwongo “kwa njia iliyoratibiwa”. Wizara pia imetoa maagizo ya kuzuiwa kwa akaunti mbili za Twitter, akaunti mbili za Instagram na akaunti moja ya Facebook inayohusika katika kueneza “habari zilizoratibiwa dhidi ya India”.

Chaneli zote za YouTube, tovuti na akaunti za mitandao ya kijamii zilikuwa zikiendeshwa kutoka Pakistani ili kueneza “habari za uwongo dhidi ya India na maudhui mengine kuhusu masuala nyeti,”.  “Tumetumia kifungu cha 69 A cha Sheria ya TEHAMA kuzuia chaneli hizi chini ya masharti ya dharura kwa kuwa yaliyomo yalikuwa na sumu kabisa na dhidi ya uhuru wa India, aina ya vita vya upotoshaji dhidi ya nchi (India),” Katibu wa Utangazaji na Habari (I&B) Apurva Chandra aliambia mkutano na waandishi wa habari siku ya Ijumaa.

Ili kuzuia akaunti na tovuti za mitandao ya kijamii za Pakistani, maagizo matano tofauti yalitolewa chini ya Kanuni ya 16 ya Kanuni za Teknolojia ya Habari (Miongozo ya Mwafaka na Kanuni za Maadili ya Vyombo vya Habari vya Dijitali), 2021 kwa waamuzi husika, huduma za intaneti zinazotolewa na idara ya mawasiliano ya simu. Chandra alisema mashirika ya kijasusi ya India “yanafuatilia kwa karibu” akaunti hizi za mitandao ya kijamii na tovuti, na kuziripoti kwa wizara ili zichukuliwe hatua mara moja.

Wizara hiyo ilisema chaneli za YouTube, tovuti na akaunti za mitandao ya kijamii, zilizoamriwa kuzuiwa, zilitumiwa na Pakistan kwa ajili ya kueneza habari ghushi dhidi ya India kuhusu masuala nyeti kama vile Jeshi la India, Jammu na Kashmir na uhusiano wa kigeni wa India na nchi nyingine.

“Walieneza maudhui ya kuhimiza utengano, kugawanya India kwa misingi ya dini, na kuunda uadui kati ya sehemu mbalimbali za jamii ya Kihindi”.  

Chanzo: Gadgets

Endelea kutembelea tovuti yetu kujifunza zaidi kuhusu teknolojia na matumizi yake na pia kupata habari mbalimbali za kiteknolojia. Soma makala zetu zingine hapa.