Kaa Tayari Kwa WIndows 8!

Chapa rasmi ya Windows 8

Weka viganja vyako tayari kwani Microsoft inajiandaa kukuletea Operating system nyingine katika mwendelezo wake wa familia za Windows. Operating system hii mpya itaitwa Windows 8. Microsoft inautangaza huu ujio mpya wa operating system ya Windows kama wazo jipya kabisa na la kipekee ambalo halijawahi kutokea katika ulimwengu mpana wa teknolojia ya kompyuta.

Operating system hii mpya itakuwa na uwezo wa kutumika katika vifaa-kompyuta vya kiganjani na kompyuta za kawaida, ikitumia kiolesura kile klie kwa vifaa vyote. Uwezo huu mpya utawanufaisha zaidi watumiaji kwa kuwaunganishia ulimwengu wa vifaa-kompyuta vya kiganjani na ulimwengu wa kompyuta za kawaida.


Pamoja na hayo, Microsoft wanategemea kwamba Windows 8 italeta ushindani zaidi katika soko linaloendelea kukua la vifaa-kompyuta vya kiganjani, vifaaa ambavyo vina uwezo unaokaribia kama sio sawia na kompyuta kubwa, vinavyojulikana kama mobile devices (tamka: mobaili divaisezi). Soko hilo kwa sasa linaongozwa na kampuni ya Apple (na bidhaa zake za iphone na ipad), kampuni ya Google (Kupitia Operating system yake Android amabayo inatumika kwenye simu nyingi, ikiwemo aina tofauti za Samsung, HTC na kampuni nyingine nyingi) na kampuni ya RIM (watengenezaji wa Blackberry).

Windows 8 kwenye kifaa-kompyuta cha kiganjani

Tayari Microsoft imetoa toleo la majaribio la Windows 8, bure kabisa kwa ajili ya kukusanya maoni kutoka kwa wadau. Toleo hili lilitolewa februari 29 mwaka huu huku wakitegemea kutangaza windows8 rasmi October mwaka huu, itakayotolewa kwa matoleo matatu tofati kwa matumizi yanayotofautiana. Windows 8 itakuwa na muonekano mpya kabisa na utakohitaji mtumiaji auzoee kidogo kabla ya kuuelewa kabisa. Microsoft wameelezea kuwa wametumia mfumo mpya wa mitindo kutengeneza operating system hiyo uitwao Metro ambao wametumia kutengeneza kiolesura kitakachotumia jina hilo hilo, kiolesura cha Metro. Kiolesura hiko kitaonekana kuwa na vigae vya pembenne kwenye skrini ambavyo kitawakilisha programu ambazo zimo kweye kompyuta yako. Vigae hivi vitakuwa pia na taarifa mbalimbali kuhusu yaliyomo kwenye programu hiyo kwa mfano, barua pepe ngapi mpya zipo kwenye programu yako ya kupata barua pepe. Utaweza kusukuma skrini (kwa kutumia mausi kwa kompyuta au kidole kwa kifaa-kompyuta cha kiganjani) ili kupata huduma mbalimbali kama kugawa habari kwenye mitandao ya kijamii. 

Windows 8 itakupa uwezo wa kutumia programu mbili kwa wakati mmoja kwenye vifaa-kompyuta vya kiganjani kama kuangalia video huku ukiandika meseji kwenye simu yako, jambo ambalo bado halijazoleka. Pia, programu za Windows 8 zitaweza kushirikiana kukuletea uwezo zaidi, kwa mfano, programu yako ya kalenda itaweza kushirikiana na programu ya facebook kukujulisha juu siku za kuzaliwa za ndugu, jamaa na marafiki zako ili uweze kukumbuka na kuwatakia heri. Microsfoft pia italeta soko lake jipya la intaneti la kuuza na ku’download’ programu za Windows 8 kama vile inavyofanywa na Apple pamoja na soko la Android. 

Pamoja na mambo mengi yatakayo kuja na Windows 8, marekebisho mengi yataletwa juu ya vitu amabavyo vilikuwepo kwenye Windows 7 na windows zingine ambazo tumevizoea. Kiole sura cha windows desktop kitakuwepo kwa ajili ya kutumia programu ambazo tumezizoea kama Microsoft office. Kwa kusema hivi, ni dhahiri kwamba programu za zamani ambazo zilikuwa zinatumika kwenye windows kabla ya Windows 8 zitaweza kutumika kwenye operating system hii mpya. Desktop hata hivyo imebadilishwa kidogo. Sasa itakuwa ni moja ya programu katika kiolesura cha Metro. 

Moja ya mabadiliko mengine ni pamoja na kuondolewa kwa kibofya cha Start (Mwanzo) kwenye skrini. Huduma ya Start, amabyo huwa na kila programu iliyokuwa kwenye kompyuta yako bado itakuwepo na itapatikana kwa njia nyingine ya kusogeza mausi yako kwenda kwenye kona ya chini ya kushoto ya skrini yako kwenye kompyuta ya kawaida. Mabadiliko mengine amabyo utakogundua kiurahisi ni ya muonekano mpya wa Task Manager mpya na Internet Explorer. 

Windows Defender itapewa uwezo wa kusaka virusi vya kompyuta na inasemekana itafuta utumiaji wa Microsoft Security Essentialls baadaye.

Bila shaka watu wengi duniani watakuwa wanaisubiria Windows 8 kwa hamu kubwa sana, huku ikiripotiwa kuwa katika siku ya kwanza, toleo la majaribio lilidownloadiwa zaidi ya mara milioni.Itabaki kuangaliwa jinsi gani Windows 8 itabadilisha vile tunavyotumia kompyuta katika ulimwengu huu wa sasa na jinsi gani italeta ushindani kwa Google na Apple pamoja na washindani wengine kwenye soko la vifaa-kompyuta vya kiganjani.