Microsoft Yazindua Chipu Inayoweza Kutufanya Kushuhudia Kompyuta za Quantum Ndani ya Miaka Michache.

Microsoft imefanya kile ambacho wengi walidhani ni ndoto ya mbali—imeunda chipu yake ya kwanza ya quantum, Majorana 1, ambayo inaweza kuleta mageuzi makubwa katika kompyuta ndani ya miaka michache ijayo.

Kwa mara ya kwanza, Microsoft inadai kuwa imeunda hali mpya ya jambo (topological state), hatua inayoweza kusaidia kutatua moja ya changamoto kubwa katika uundaji wa kompyuta za quantum: uthabiti wa qubits.

Chipu ya Quantum Iliyojengwa kwa Teknolojia ya Kipekee

Kompyuta za kawaida hutumia bits ambazo zinaweza kuwa katika hali ya “1” au “0”. Kwa upande mwingine, qubits kwenye kompyuta za quantum zinaweza kuwa katika hali zote mbili kwa wakati mmoja, jambo linalozifanya kuwa na uwezo mkubwa wa kushughulikia data kwa kasi isiyo na kifani.

Hata hivyo, changamoto kubwa inayowakumba wanasayansi wa quantum ni jinsi ya kuzifanya qubits ziwe thabiti na zisiharibike kwa urahisi. Hapa ndipo Microsoft imeleta mapinduzi kwa kutengeneza qubits nane za topolojia kwa kutumia mchanganyiko wa:

• Indium arsenide, aina ya semiconductor
• Alumini, ambayo ni superconducter

Kwa kutumia teknolojia ya hali ya juu, Microsoft imeweza kupanga atomi moja baada ya nyingine ili kuhakikisha malighafi hizi zinakaa katika mpangilio bora wa kusababisha hali ya jambo ya topolojia.

Kwa Nini Hii Ni Hatua Kubwa?

Tofauti na njia nyingine za kutengeneza kompyuta za quantum, chipu ya Majorana 1 inahakikisha qubits zake zinadhibitiwa kwa usahihi na zina uwezo wa kufanya kazi kwa uthabiti zaidi.

Kwa kawaida, qubits huwa dhaifu na zinahitaji mazingira ya hali ya juu ili kufanya kazi vizuri. Lakini kupitia njia hii mpya ya topolojia, Microsoft inasema imepiga hatua kuelekea kutengeneza kompyuta za quantum ambazo ni imara na zinaweza kufanya kazi kwa ufanisi mkubwa bila makosa mengi.

Bado Haitapatikana Kwa Watumiaji wa Kawaida

Tofauti na chipu yake ya akili bandia Maia 100, ambayo tayari imepangwa kutumiwa kwenye huduma za Azure Cloud, Microsoft haitaruhusu wateja kutumia Majorana 1 kwa sasa. Badala yake, chipu hii itatumika kwa tafiti na majaribio, huku kampuni ikilenga kutengeneza kompyuta ya quantum yenye qubits milioni moja katika siku zijazo.

Kwa sasa, Microsoft inashirikiana na maabara za kitaifa na vyuo vikuu kuchunguza zaidi jinsi chipu hii inaweza kufanikisha ndoto ya quantum computing kwa matumizi ya kibiashara.

Kompyuta za Quantum Zinaweza Kufanya Nini?

Ikiwa teknolojia hii itaendelea kukua kama inavyotarajiwa, kompyuta za quantum zitakuwa na matumizi makubwa, ikiwa ni pamoja na:

 Kutengeneza dawa mpya kwa muda mfupi zaidi
Kufanya mahesabu tata ya kifedha kwa usahihi mkubwa
Kusaidia katika utafiti wa hali ya hewa na tabia nchi
Kukuza teknolojia ya akili mnemba (AI) kwa kutengeneza data kwa kasi kubwa

Kwa kifupi, maendeleo haya yanaweza kubadili ulimwengu wa teknolojia kwa njia ambazo hatujawahi kushuhudia.

Je, Quantum Computing Ipo Karibu Zaidi Kuliko Tulivyodhani?

Kwa muda mrefu, wataalamu walikadiria kuwa tungehitaji miongo kadhaa kabla ya kuona kompyuta za quantum zikifanya kazi kwa ufanisi. Lakini Microsoft inaamini kuwa maendeleo haya yanaweza kupunguza muda huo hadi miaka michache tu.

Ikiwa Majorana 1 itathibitisha uwezo wake, basi tunaweza kuwa kwenye njia sahihi kuelekea enzi mpya ya kompyuta za quantum. Swali ni: Je, dunia iko tayari kwa mapinduzi haya?