Je, Wazo la Kuhamia Kwenye Roboti Litagharimu Zaidi Kuliko Matumizi ya Binadamu?

Toyota inataka roboti 400,000 katika mfumo wake wa uzalishaji. Kuanzia 2028, kampuni inakadiria kutumia dola bilioni 6.4 kila mwaka kufadhili mpango huo wa automation.

Hii si robot moja kusaidia mfanyakazi kwenye kiwanda. Ni Toyota kuanza kufikiria upya jinsi kiwanda chenyewe kinapaswa kufanya kazi. Swali ambalo namba hizo hazijibu ni moja: Je, roboti kweli zitakuwa nafuu kuliko binadamu?

Kwa Nini Toyota Inataka Roboti Sasa?

Nguvu kazi inabadilika. Viwanda vinakabiliwa na wafanyakazi wachache, nguvu kazi inayozeeka na mishahara inayoongezeka. Kwa kampuni inayotengeneza magari kwa kiwango kikubwa, hiyo inabadilisha gharama ya kila gari linalotoka kiwandani.

Roboti zinatoa njia nyingine. Mashine zinaweza kufanya kazi zinazojirudia, huku binadamu wakibaki kwenye maeneo yanayohitaji maamuzi na uangalizi. Toyota pia inaangalia roboti wanaofanya kazi karibu na watu, pamoja na humanoid robots.

Lengo si kuweka mashine kiwandani kwa sababu ni teknolojia mpya. Lengo ni kubadilisha hesabu ya uzalishaji.

Dola Bilioni 6.4 Zitaenda Wapi?

Bei ya roboti ni sehemu tu ya hesabu. Kiwanda kinapobadilishwa kuwa cha automation, miundombinu nayo inahitaji kubadilika. Mashine zinahitaji kuunganishwa, mifumo ya usalama kuwekwa na wafanyakazi kufundishwa kuzisimamia.

Hapo ndipo swali linakuwa gumu: Ni lini gharama ya roboti inaanza kuwa ndogo kuliko gharama ya kumlipa binadamu? Hakuna namba moja inayojibu hilo. Inategemea mishahara, ufanisi wa mashine, gharama za matengenezo na aina ya kazi inayofanywa.

Kiwanda Kikibadilika, Mji Unabadilika

Kuna gharama nyingine ambayo haionekani kwenye hesabu ya Toyota: ajira. Kiwanda kinapopunguza utegemezi kwa binadamu, baadhi ya wafanyakazi wanaweza kupoteza nafasi ambazo zimekuwa chanzo cha kipato kwa miaka mingi.

Athari haishii kwenye geti la kiwanda. Duka lililokuwa likitegemea wafanyakazi. Nyumba zilizopangishwa kwao. Usafiri wa kila siku. Biashara ndogo zilizojengwa kuzunguka mshahara wa kiwanda. Automation inapobadilisha kazi, inaweza kubadilisha uchumi mzima unaozunguka kazi hizo. Hii ndiyo sehemu ambayo hesabu ya biashara na hesabu ya jamii zinaanza kutofautiana.

Toyota Inaingia Kwenye Mashindano Mapya

Toyota si kampuni pekee inayofanya hesabu hii. Hyundai inapanga kutumia humanoid robots katika kiwanda chake cha Georgia nchini Marekani kuanzia 2028. Kampuni hiyo tayari inamiliki Boston Dynamics, mojawapo ya kampuni zinazojulikana zaidi kwenye teknolojia ya roboti.

Kwa Toyota, uwekezaji huu unaweza kuwa zaidi ya kupunguza gharama za magari. Wachambuzi wa Bernstein wameona uwezekano wa robotics kuwa sehemu ya ukuaji wa kampuni nje ya biashara yake ya kawaida ya magari. Roboti inaweza kuanza kama mashine ndani ya kiwanda, lakini ikawa biashara yenyewe.

Lakini…

Toyota inajaribu kujibu swali moja kwa kutumia dola bilioni 6.4: Je, kiwanda cha kesho kinaweza kuzalisha zaidi kwa kutegemea mashine kuliko binadamu? Lakini dunia italazimika kujibu swali lingine: Kama roboti zitakuwa nafuu kwa kampuni, zitakuwa nafuu kwa jamii pia?

Soma Pia:

• Mfululizo wa Matukio Yenye Wasiwasi na Siku Kumi Zilizobadilisha AI

• Gemini AI Ya Google Yavamia Mifumo Ya Kampuni Tatu Wakati Wa Jaribio La Usalama

• China Sasa Inaunda Roboti za Kijeshi Wanazopanga Kutumia Vitani

Vyanzo:

• Reuters — Toyota estimates factory automation could cost $6.4 billion per year from 2028

• Automotive World — Toyota plans to deploy 400,000 factory robots from 2028

• Miami Herald — Toyota’s Factory Automation Could Need 400,000 Robots, But It Hasn’t Committed the Money

• Reuters — Hyundai Motor Group plans to deploy humanoid robots at US factory from 2028